పోషకాహారంతోనే రక్తహీనతకు చెక్
– గర్భిణీలు, బాలింతలు, తల్లులు పౌష్టికాహారంపై ప్రత్యేక శ్రద్ధ చూపాలి
– ఏడబ్ల్యూఎస్ సూపర్వైజర్ సుజాత
రామన్నపేట అక్షిత ప్రతినిధి
గర్భిణీలు, బాలింతలు, చిన్నారుల తల్లులు తమ ఆరోగ్యంపై ప్రత్యేక శ్రద్ధ వహిస్తూ పోషకాహారాన్ని తప్పనిసరిగా తీసుకోవాలని ఏడబ్ల్యూఎస్ సూపర్వైజర్ సుజాత సూచించారు. పోషణ మాసం సందర్భంగా అంగన్వాడీ కేంద్రాల ఆధ్వర్యంలో నిర్వహిస్తున్న అవగాహన కార్యక్రమాల్లో భాగంగా ఆమె మాట్లాడారు. ఈ సందర్భంగా సుజాత మాట్లాడుతూ.. గర్భిణీలు, బాలింతలకు పౌష్టికాహారం ఎంతో అవసరమన్నారు. రోజువారీ ఆహారంలో ఆకుకూరలు, పప్పులు, కూరగాయలు, పండ్లు, గుడ్లు, చిరుధాన్యాలు వంటి పోషక విలువలు కలిగిన ఆహార పదార్థాలను చేర్చుకోవాలని సూచించారు. సమతుల ఆహారం తీసుకోవడం ద్వారా తల్లితో పాటు గర్భంలోని శిశువు ఆరోగ్యంగా ఎదగడానికి దోహదపడుతుందని తెలిపారు.
రక్తహీనతపై అప్రమత్తంగా ఉండాలి
మహిళల్లో రక్తహీనత సమస్యను నివారించేందుకు ఐరన్, ఫోలిక్ యాసిడ్ వంటి పోషకాలు అందే ఆహారాన్ని తీసుకోవాలని సుజాత సూచించారు. వైద్య సిబ్బంది సూచించిన ఐరన్–ఫోలిక్ యాసిడ్ మాత్రలను క్రమం తప్పకుండా తీసుకోవడంతో పాటు, అవసరమైన ఆరోగ్య పరీక్షలు చేయించుకోవాలని తెలిపారు. అలసట, నీరసం వంటి లక్షణాలను నిర్లక్ష్యం చేయకుండా వైద్యులను సంప్రదించాలని సూచించారు.
తల్లి ఆరోగ్యమే.. బిడ్డకు రక్షణ
గర్భిణీలు క్రమం తప్పకుండా వైద్య పరీక్షలు చేయించుకోవాలని, బాలింతలు ప్రసవానంతరం తమ ఆరోగ్యంతో పాటు శిశువుకు తగిన పోషకాహారం అందించడంపై శ్రద్ధ వహించాలని సుజాత పేర్కొన్నారు. చిన్నారులకు తల్లిపాలు, వయసుకు అనుగుణంగా అదనపు పోషకాహారం అందించడం ముఖ్యమన్నారు.“పోషకాహారం తీసుకోవడం ఒక అలవాటుగా మార్చుకోవాలి. గర్భిణీలు, బాలింతలు, తల్లులు ఆరోగ్యంగా ఉంటేనే కుటుంబం ఆరోగ్యంగా ఉంటుంది. రక్తహీనతను నివారించేందుకు పోషకాహారంపై ప్రతి ఒక్కరూ అవగాహన పెంచుకోవాలి. పోషణ మాసం సందర్భంగా నిర్వహిస్తున్న కార్యక్రమాలను సద్వినియోగం చేసుకోవాలి” అని ఏడబ్ల్యూఎస్ సూపర్వైజర్ సుజాత అన్నారు.ఈ కార్యక్రమంలో అంగన్వాడి టీచర్స్ చిప్పలపల్లి సౌజన్య నాగటి మంగమ్మ ఆయా వార్డ్ మెంబర్స్ కట్ట తనుశ్రీ నోముల ఉమాదేవి తల్లితండ్రులు తదితరులు పాల్గొన్నారు
