ఎన్నికల ప్రక్రియ 72 శాతం పూర్తి
తాండూర్ మున్సిపాలిటీ, గౌతాపూర్లో రాష్ట్ర ప్రధాన ఎన్నికల అధికారి సుదర్శన్ రెడ్డి క్షేత్రస్థాయి పరిశీలన
తాండూర్ అక్షిత ప్రతినిధి
జిల్లాలో కొనసాగుతున్న ఎన్నికల ప్రక్రియ 72 శాతం పూర్తయిందని రాష్ట్ర ప్రధాన ఎన్నికల అధికారి సుదర్శన్ రెడ్డి తెలిపారు. ఎన్నికల ప్రక్రియను పరిశీలించేందుకు తాండూర్లో పర్యటించిన ఆయన.. మున్సిపాలిటీతో పాటు గౌతాపూర్లో జరుగుతున్న ఎన్నికల సంబంధిత కార్యక్రమాలను క్షేత్రస్థాయిలో పరిశీలించారు.ఈ సందర్భంగా ఓటర్ల జాబితా పరిశీలన, ఎన్నికల ఏర్పాట్లు, అధికారుల పనితీరు తదితర అంశాలపై సంబంధిత అధికారులను అడిగి వివరాలు తెలుసుకున్నారు. తాండూర్ మున్సిపాలిటీ పరిధిలో జరుగుతున్న ప్రక్రియను పరిశీలించిన అనంతరం అధికారులతో సమీక్ష నిర్వహించారు. అనంతరం గౌతాపూర్ ప్రాంతంలోనూ ఎన్నికల ప్రక్రియను పరిశీలించి అక్కడి పరిస్థితులపై ఆరా తీశారు.ఈ సందర్భంగా సుదర్శన్ రెడ్డి మాట్లాడుతూ.. జిల్లాలో ఎన్నికల ప్రక్రియ 72 శాతం పూర్తయిందని, మిగిలిన ప్రక్రియను నిర్ణీత నిబంధనల ప్రకారం పూర్తి చేయాలని అధికారులకు సూచించారు. ఎన్నికల ప్రక్రియలో ఎలాంటి ఇబ్బందులు తలెత్తకుండా సంబంధిత శాఖల అధికారులు సమన్వయంతో పనిచేయాలని అన్నారు.ఓటర్ల జాబితాకు సంబంధించిన అంశాలను క్షుణ్ణంగా పరిశీలించాలని, ఎన్నికల ప్రక్రియలో పారదర్శకతకు అత్యంత ప్రాధాన్యం ఇవ్వాలని సూచించారు. క్షేత్రస్థాయిలో ఎదురవుతున్న సమస్యలను ఎప్పటికప్పుడు గుర్తించి పరిష్కరించేలా చర్యలు తీసుకోవాలని అధికారులను ఆదేశించారు.రాష్ట్ర ప్రధాన ఎన్నికల అధికారి పర్యటనలో జిల్లా, మున్సిపల్, ఎన్నికల శాఖలకు చెందిన అధికారులు పాల్గొన్నారు. తాండూర్ మున్సిపాలిటీ, గౌతాపూర్లో కొనసాగుతున్న ఎన్నికల ప్రక్రియకు సంబంధించిన వివరాలను అధికారులు ఆయనకు వివరించారు.
